Numbers 15

Eminye iminikelo

1UJehova wathi kuMosi, 2“Tshela abako-Israyeli uthi kubo: ‘Ngemva kokungena kwenu elizweni engilinika lona libe likhaya lenu

3njalo lethule iminikelo yenu eyenziwa ngomlilo kuJehova, kusukela emihlambini yezinkomo leyezimvu, kube luqhatshi olumnandi kuJehova – kungakhathalekile ukuthi ngumnikelo wokutshiswa kumbe ngumhlatshelo, kungokwezifungo eziqakathekileyo loba iminikelo yokuzithandela loba eyemikhosi –

4ngakho lowo oletha umnikelo wakhe uzakwethula kuJehova umnikelo wamabele oyingxenye eyodwa etshumini lehefa lefulawa ecolekileyo exutshaniswe lamafutha ayingxenye eyodwa kokune eyehini. 5Lungisa lewundlu ngalinye elomnikelo wokutshiswa loba umhlatshelo ingxenye eyodwa kokune yehini yewayini njengomnikelo wokunathwayo.

6“ ‘Kuthi ngenqama ulungise umnikelo wamabele ube yisilinganiso sokubili kokulitshumi kwehefa lefulawa ecolekileyo exutshaniswe lamafutha ayisilingansio esisodwa kokuthathu kwehini, 7lewayini eliyisilinganiso sehini esisodwa kokuthathu kube ngumnikelo wokunathwayo. Kunikele kube luqhatshi olumnandi kuJehova.

8“ ‘Nxa ulungisa inkunzi eliguqa njengomnikelo wokutshiswa loba umhlatshelo, kusenzelwa isifungo esiqakathekileyo loba umnikelo wobudlelwano kuJehova, 9letha ndawonye lenkunzi umnikelo wamabele acholiweyo aba yifulawa ecolekileyo eyisilinganiso sehefa esokuthathu etshumini exutshaniswe lamafutha ayingxenye yehini.

10Letha njalo lewayini eliyizilinganiso zengxenye yehini kube ngumnikelo wokunathwayo. Kuzakuba ngumnikelo owenziwa ngomlilo, uqhatshi olumnandi kuJehova. 11Ngakho inkunzi inye ngayinye loba inqama, iwundlu ngalinye ngalinye loba izinyane lembuzi, akulungiswe ngale indlela.

12Lokhu kwenze emnikelweni ngamunye loba ulungise emingaki.

13“ ‘Wonke ozalwa lapha kumele enze lezizinto ngale indlela lapho eletha umnikelo wakhe owenziwe ngomlilo njengoqhatshi olumnandi kuJehova. 14Ezizukulwaneni ezilandelayo, owezizweni loba ngubani ohlezi lani nxa esethula umnikelo owenziwa ngomlilo njengoqhatshi olumnandi kuJehova, kumele enze khona lokho elikwenzayo. 15Imithetho le kumele uyilandele wena labantu bakule indawo kanye labezizweni abahlala phakathi kwenu; lesi yisimiso esimi njalo lakuzizukulwane ezilandelayo. Lina kanye labezizweni lizafanana phambi kukaJehova: 16Lizabuswa ngemithetho lemilayo efananayo lina kanye labezizwe abahlala phakathi kwenu.’ ”

17UJehova wathi kuMosi, 18“ ‘Tshela abako-Israyeli uthi: ‘Ekungeneni kwenu elizweni engilisa kulo 19njalo lingadla ukudla kwalelolizwe, yethulani ingxenye yakho ibe ngumnikelo kuJehova. 20Lethani ikhekhe elenziwe ngempuphu yakuqala lilethule njengomnikelo ovela endaweni yokubhula.

21Kuzo zonke izizukulwane ezilandelayo lizakwethula umnikelo kuJehova uthethwe emputshini yenu yakuqala.

Umnikelo wezono ezingenziwanga ngabomo

22“ ‘Kungakho nxa wehlulekile ukugcina loba yiyiphi imilayo uJehova ayinika uMosi ungananzelelanga – 23loba yiyiphi imilayo kaJehova alitshele yona ngoMosi, kusukela ngosuku uJehova amupha yona kuqhubekela ezizukulwaneni ezilandelayo – 24kanti njalo lokhu kwenzakele ngephutha abantu bengakunanzelele, kutsho ukuthi abantu bonke bakuleyondawo bazanikela ngenkunzi eliguqa kube ngumnikelo wokutshiswa oloqhatshi olumnandi kuJehova, ndawonye lomnikelo wamabele lowokunathwayo, kanye lembuzi enduna eyomnikelo wesono njengokumisiweyo.

25Umphristi uzakwenzela isizwe sonke sako-Israyeli indlela yokubuyisana, ngakho bazathethelelwa, ngoba bekungayisingabomo njalo balethile phambi kukaJehova umnikelo owenziwe ngomlilo kanye lomnikelo wesono ungowokona kwabo. 26Abantu bonke bako-Israyeli kanye labezizwe abahlala labo bazathethelelwa, ngoba bonke lababantu babengonanga ngabomo.

27“ ‘Kodwa nxa kungumuntu oyedwa owonayo kungesikho ngabomo, kumele alethe imbuzi ensikazi elomnyaka owodwa ibe ngumnikelo wesono. 28Umphristi uzamenzela lowo owone ngokwenza isono kungesikho ngabomo indlela yokubuyisana okaJehova, kuthi ngemva kokuba indlela yokubuyisana isiyenziwe, uzathethelelwa.

29Wonalo umthetho ngowomuntu wonke owonayo kungesikho ngabomo, kungakhathalekile ukuthi ungowako-Israyeli ozalelwe khonapha kumbe ngowezizweni.

30“ ‘Kodwa loba ngubani owenza isono ngabomo, ongozalwa elizweni loba engowezizweni, athuke uJehova, lowomuntu uzaxotshwa ebantwini bakibo. 31Ngenxa yokweyisa ilizwi likaJehova lokwephula imilayo yakhe, lowo muntu ngempela kaxotshwe kwabakibo; uhlala elokhu elalo icala.”

Ukubulawa komuntu owephula umthetho weSabatha

32Ngesikhathi abako-Israyeli besenkangala, indoda ethile yatholakala itheza inkuni ngosuku lweSabatha. 33Kwathi labo abamficayo etheza bamusa kuMosi lo-Aroni kanye lakubo bonke abantu, 34ngoba kungakazakali ukuthi kumele enziweni; wavalelwa entolongweni. 35UJehova wasesithi kuMosi, “Indoda leyo kumele ife. Abantu bonke kumele bamkhande ngamatshe ngaphandle kwezihonqo.” 36Ngakho abantu bamusa ngaphandle kwezihonqo bamkhanda ngamatshe waze wafa, njengokulaywa kukaMosi nguJehova.

Izintshaka ezambathweni

37UJehova wathi kuMosi, 38“Tshela abako-Israyeli uthi kubo: ‘Kuzo zonke izizukulwane ezizayo, alibothungela izixha zezintshaka emiphethweni yezambatho zenu, isixha ngasinye sibe lentambo eluhlaza. 39Lizakhumbula imilayo yonke kaJehova njalo liyilalele izikhathi zonke nxa likhangela lezizintshaka ukuze lingalandeli izinkanuko zezinhliziyo zenu kanye lamehlo enu liduhe. 40Ngakho lizakhumbula ukuyilandela yonke imilayo yami ukuze lehlukaniselwe uNkulunkulu wenu. 41Mina nginguJehova uNkulunkulu wenu, owalikhupha eGibhithe ukuze ngibe nguNkulunkulu wenu. NginguJehova uNkulunkulu wenu.’ ”